Hindi mo kase inaasahan na masasaktan ka kaya ka ganyan. Akala mo kaya mo na ang lahat. Di lang sa iyo umiikot ang mundo. Hindi lahat ay maghihintay sa iyo. Hindi lahat maiintindihan ang nararamdaman mo. May mga taong darating. Mayroon aalis. Mayroon kailangang umalis. At mayroon ka ding pinapaalis kahit hindi mo sinasadya.
Wala kang dapat pagsisihan. Ginawa mo lang ang nararapat at ang sa tingin mong mas patas sa iba. Ayaw mo din makasakit ng tuluyan. Lalo na ngayon. Magulo ka. At habang magulo ka pa, di ka dapat mandamay ng iba. Kayanin mo muna yan mag-isa. Hayaan mo munang tuluyang maghilom ang mga sarili mong sugat. Binibigyan ka niya ng pagkakataon.
At kahit na nalulungkot ka, isipin mo na lang na kailangan iyong gawin---dahil hindi lang ikaw ang mundo. At may mga mundong patuloy na iikot kahit wala ka doon. Masanay ka na.
